Шаулап үтте "Ҡорама-туй"

Кисә, 29 майҙа, Горчак ауылында район Мәҙәниәт йортоноң "Пэчворк" түңәрәге ағзалары ойошторған "Ҡорама-туй" байрамы гөрләп уҙҙы. Сарала Буранғол, Ҡоръятмаҫ, Алға, Мәкәш, Горчак ауылдарының ҡорама ҡорау оҫталары ҡатнашты. Улар тамашасылар ҡарамағына үҙҙәренең эштәрен тәҡдим итте, оҫталыҡ дәрестәре ойошторҙо, бер-береһе менән ҡорама ҡорау серҙәре менән уртаҡлашты. Бөтә эштәр ҙә үҙенсәлекле булыуҙары, сағыу туҡымаларҙан тегелеүе менән кешеләрҙең иғтибарын үҙҙәренә йәлеп итте. Буранғол ауылы мәҙәниәт йорто мөдире Резеда Ҡорбанғәлиеваның ҡораманан ҡорап тегелгән Дәүләкән гербы тамашасыларға айырыуса оҡшаны. Байрам уңайынан Р. Ҡорбанғәлиева матур шиғыр ҙа ижад иткән. Уны һеҙҙең иғтибарға тәҡдим итәбеҙ. "Ҡорама-туй" байрамы йыр-бейеү, уйын-көлкө менән аралаштырып алып барылды. Мәҙәни саранан бөтәһе лә ҡәнәғәт ҡалды.

Ҡорама-туй
Әсәй матур күлдәк теккән,
Әҙерәк ситсаһы артҡан.
Тегенсе Миңнур инәйҙән
Бескән итәктән -ҡалған.

Ҡыҙылы, һары, ҡараһы,
Бигерәк күп ҡорама.
Төҫтө төҫкә йүрмәп өлгөр,
Ҡайҙан алғанды һорама.

Ромбик, өсмөйөш, оҙонса,
Уртаһында - дүрткеле.
Ҡорама ҡороп, йорт йәмләр
Ҡатын-ҡыҙҙың йүнселе.

Һаҡсыллыҡмы, оҫталыҡмы,
Халыҡ бик тырыш булған.
Юрған һырыған, балаҫ һуҡҡан,
Ҡул ҡаушырып ятмаған.

Оҫта ҡулдар ярыша,
Һин дә уларҙан ҡалышма.
Бороңғо йола-туйыбыҙ,
Яҡты булһын уйығыҙ ! (Р. Ҡорбанғәлиева).